Bjarki vann hálvmaraton

Bjarki Johannessen rann ikki teir 42 kilometrarnar, tá Tórshavn Maraton var um vikuskiftið.

Fyri kortum rann hann maraton í Berlin, og tískil var ikki ráðiligt at fara undir lutfalsliga harða teinin úr Havn til Kaldbaks og aftur. 

Í staðin royndi hann seg í hálvum maraton.

 - Kroppurin er ikki ordiliga klárur til eitt maraton afturat enn, segði Bjarki Johannessen á málinum eftir renningina leygardagin.

 - Mann plagar at siga, at tú rennur tvey maraton um árið, eitt um várið og eitt um heystið, so eg meldaði meg til hálvmaraton í dag.

Eftir at hava dominera á ymiskum langteinum síðstu árini er toftamaðurin farin undir miðvísa maratonvenjing.

Ætlanin nú er at renna nakrar kappingar í Føroyum í summar - millum annað á Føroyaleikum - og síðan at renna eitt maraton í heyst, antin í Odense ella í Berlin.