SV: Snowden og Manning eiga at fáa friðarheiðursløn

Næstformaðurin í uttanríkis- og verjunevndini í norska Stórtinginum, Snorre Valen, limur í Sosialistiska Vinstraflokkinum, heldur, at teir báðir skulu luta friðarheiðursløn Nobels í millum sín í 2014.

Avdúking endaði Irak-kríggið
- Bradley Manning hevur avdúka skjøl, sum vóru við til at enda Irak-kríggið. Hann avdúkaði eisini ágang, sum heimurin átti at vita. Edward Snowden hevur avdúkað umfatandi avlurting, sum vit øll eru offur fyri í heitinum “stríðið ímóti yvirgangi”, sigur Snorre Valen.

Svenskur professari
Svenski professarin í sosiologi, Stefan Svallfors, útnevndi í farnu viku eisini Snowden. Frammanundan hevur norðurírski friðaraktivisturin og friðarheiðurslønarmóttakarin, Mairead Corrigan-Maguire, útnevnt Manning sum møguligan friðarheiðurlønarmóttakara.

Valen skrivar í grundgevingunum, at hann í útgangsstøðinum ikki tekur undir við at leka loyniligar upplýsingar, men han heldur avdúkarar vera týdningarmiklar at verja almenningin móti ólógligari avlurting. Hann metir, at USA jagstrar beinleiðis teir báðar avdúkararnar.

Kelda: NTB og Aftenposten