Gevst sum ítróttastjóri í AB

Jonas Dal Andersen gevst sum ítróttastjóri í AB.

Hann er settur í starv hjá danska fótbóltsfelagnum FC Midtjylland, har hann skal hava ábyrgd av samstarvinum við nigerianska FC Ebedei, sum er partur av ungdómsakademiinum hjá danska felagnum.

AB skrivar á heimasíðuni, at hann byrjar í starvinum 1. august.

Hann verður virkandi høvuðsvenjari á Argjum til summarsteðgin.

Jonas Dal Andersen tók við sum fyribils venjari, tí Sámal Erik Hentze segði seg úr starvi.

Í andglettin

AB og Jonas Dal Andersen komu í andglettin herfyri, tá ið tað kom fram, at útlendskir spælarar, sum komu til AB í vetur, rindaðu størstan partin av lønini beinleiðis aftur til AB.

45 ára gamli Jonas Dal Andersen hevur fyrr starvast hjá FC Midtjylland. Hann var í venjaratoyminum árini frá 2003 til 2013.

FC Ebedei í Nigeria hevur í fleiri ár vant spælarar, sum síðani eru farnir til FC Midtjylland at spæla.

AB arbeiðir nú við at seta nýggjan høvuðsvenjara til besta mansliðið.

Gongst sum ætlað, verður venjarin settur í hesari vikuni.