Stórur munur á brennievnisprísunum í Føroyum

Stórur munur er á brennievnisprísunum í Føroyum og prísinum á Brent-ráolju.

Mikudagin kostaði gassoljan í miðal 9,91 kr. fyri liturin í Føroyum. Brentprísurin var 5,67 kr. Munurin er 4,24 kr.

Bensinið kostaði í miðal 10,26 kr. Brentprísurin var 5,67 kr. Munurin er 4,59 kr.

Og diesel kostaði 10,15 kr. í miðal. Brentprísurin var 5,67 kr., so her er munurin 4,48 kr.

Vantandi kapping helst orsøkin

Kappingareftirlitið hevur avgjørt at almannakunngera hagtølini um oljuprísir, sum Kappingareftirlitið hevur, nú oljuprísirnir eru alsamt frammi í fjølmiðlunum.

Kappingareftirlitið sigur, at tað er altíð ein møguleiki, um virkin kapping ikki er á einum marknaði, at príshækkingar gerast hægri enn innkeypsprísir geva orsøk til.

Kappingareftirlitið staðfesti í frágreiðingini “Oljumarknaðurin í Føroyum - frágreiðing um sølu av brennievnum í Føroyum”, sum var almannakunngjørd í 2016, at føroysku oljuprísirnir vóru høgir, og at vantandi kapping helst var orsøkin.

Kappingareftirlitið mælti tá til at skapa umstøður fyri betri kapping við at áleggja verandi oljufeløgum eina samhandilsskyldu í sambandi við heilsølu. 

Hetta vildi gera tað lættari hjá nýggjum feløgum at koma inn á marknaðin fyri smásølu.

Kunngera príshagtøl

Kappingareftirlitið hevur síðani frágreiðingina í 2016 hildið eyga við føroysku oljuprísinum. 

Prísirnir eru dagliga tiknir niður av heimasíðunum hjá oljufeløgunum, og við millumbilum samanbornir við viðkomandi samanberingargrundarlag, sum er prísurin á Brentráolju.

Øll hesi hagtøl almannakunnger Kappingareftirlitið nú. 

Tey eru á heimasíðuni hjá Kappingareftirlitinum.