Føroyskir tónleikarar á stórar evropiskar showcase-festivalar

Tá stóri íslendski festivalurin, Iceland Airwaves, verður hildin í Reykjavík fyrst í november, eru fimm føroysk tónleikanøvn á skránni, og so nógv hava ongantíð áður spælt á íslendska showcase-festivalinum eitt og sama ár. 

Tað boðar Faroe Music Export (FMX), ið er føroyska tónleikaútflutningsstovan, frá í tíðindaskrivi.

Showcase-festivalar eru tónleikafestivalar, har áhoyrarar, tónlistafólk og tónleikavinnan møtast. Eitt slag av framsýningarfestivali fyri tónleikarar og tónleikavinnuna. 

Dania Ó. Tausen

Fyrst í september framførir Dania O. Tausen sum fyrsta føroyska tónlistafólk nakrantíð á Vill Vill Vest í Bergen, sum er ein festivalur, ið ikki er ólíkur SPOT í Danmark.

Joe and The Shit Boys

Bara tvær vikur seinni byrjar by:Larm-festivalurin í Oslo, sum sambært festivalinum sjálvum er bæði tann størsti og týdningarmesti showcase-festivalurin í Skandinavia. Her sleppa áhoyrararnir og tónleikavinnan at uppliva bæði Brimheim og Joe & The Shitboys.

Brimheim, Helena Heinesen Rebensdorff

Bara eina viku eftir by:Larm er tann stóri og viðurkendi Reeperbahn festivalurin á skránni. Festivalurin í Hamburg sigst vera tann størsti og týdningarmesti showcase-festivalurin á einum av heimsins størstu musikkmarknaðum – Týsklandi. Eisini her eru Joe & The Shitboys og Brimheim við.

Marius DC

Marius DC, ið vann Sement 2022, fer eisini út at ferðast. Ungi hipphopparin og rapparin er, sum tað fyrsta føroyska listafólkið higartil, úttikið til festivalin New Skool Rules í Rotterdam í oktober. Hetta er ein showcase-festivalur, ið lýsir við at vera tann størsti showcase-festivalurin fyri hipphopp og rapp í Evropa.

Marius er eisini eitt av teimum fimm listafólkunum, sum skulu spæla á Iceland Airwaves saman við Janusi Rasmussen, Brimheim, Kóboykex og Guðrið Hansdóttir.

janus_rasmussen_20_01_c_eydis_maria_olafsdottir.jpg

"Hetta er rættiliga spennandi tíð hjá føroyskum tónleiki og tónleikavinnuni," sigur Glenn Larsen, stjóri í FMX.

"Umframt alt tað, ið er nevnt omanfyri, so hava vit gott samskifti við Trondheim Calling, sum verður í februar 2023. Vit vænta eisini at fáa pláss til fleiri føroysk tónlistafólk á stórum festivalum, sum t.d. Eurosonic (ESNS) í januar, Tallinn Music Week, og SPOT í mai."

Koyboykeks

Umboð fyri bæði Reeperbahn Festival  í Hamburg og The Great Escape í Brighton vóru millum luttakararnar á G! Festivalinum í ár, her tey upplivdu fleiri konsertir við føroyskum tónlistafólkum, føroyska mentan og høvdu fundir við føroysku tónleikavinnuna.

Showcase-festivalar við føroyskari luttøku
Vill Vill Vest er í Bergen millum 1. og 3. september
by:Larm er í Oslo millum 15. og 17. september
Reeperbahn Festival er í Hamburg frá 21. til 24. september
New Skool Rules er í Rotterdam í Hollandi frá 7. til 9. oktober
Iceland Airwaves er í Reykjavik frá 3. til 5.november