200.000 fólk farin í hertænastu í Russlandi

Meira enn 200.000 fólk eru nú farin í hertænastu í russiska herinum, síðani fráboðanin um innkallingar til tænastu kom.

Tað sigur verjumálaráðharrin í Russlandi, Sergej Sjoigu.

21. september boðaði forsetin, Vladimir Putin, frá, at eykaherdeildir fóru at vera boðsendar til tænastu. 

Endamálið er at styrkja stríðsførleikan hjá russiska herinum í Ukraina.

Tað tekur tíð, áðrenn flestu eykaherfólkini koma fram til hermótið, har tey skulu lærast upp og fáa útgerð.