Svøríki skal upp í Nato sum skjótast

Svøríki skal brúka tvey prosent av bruttotjóðarúrtøkuni til verjuna fyri 2026.

Tað sigur svenski forsætisráðharrin, Ulf Kristersson, í røðu í dag, sambært danska kringvarpinum.

Málið hjá NATO-samgonguni er, at limalondini skulu brúka í minsta lagi tvey prosent av bruttotjóðarúrtøkuni til verjuna.

Svenska stjórnin vil, at Svøríki sum skjótast verður limur í NATO-samgonguni. Stjórnin væntar, at øktu útreiðslurnar til verjuna fara at hjálpa svium fram á leið.

Megna sviar at brúka tvey prosent av bruttotjóðarúrtøkuni fyri 2026, røkka teir málinum sjey ár fyri danir, sum ætla at brúka tvey prosent av bruttotjóðarúrtøkuni til verjuútreiðslur í 2033.