Javnaðarflokkurin og Sambandsflokkurin varðveita sessirnar

Javnaðarflokkurin og Sambandsflokkurin varðveita fólkatingssessirnar.

Tað vísir nýggj veljarkanning, sum spyr.fo hevur gjørt fyri Kringvarpið í dag.

Kanningin vísir, at Javnaðarflokkurin verður størsti flokkur við 28,3 prosentum, sum eru 2,8 prosentstig meira enn á fólkatingsvalinum í 2019.

Sambandsflokkurin, sum var størsti flokkur á fólkatingsvalinum seinast, fær í kanningini 27,3 prosent av atkvøðunum, ella eitt prosentstig minni enn á valinum í 2019.

Veljarakanning, Fólkatingsval 2022

Fólkaflokkurin nummar trý

Fólkaflokkurin er á triðja plássi við 18,9 prosentum. Tað eru umleið fimm prosentstig minni enn á fólkatingsvalinum í 2019, tá Fólkaflokkurin fekk 23,8 prosent.

Tjóðveldi fær í kanningini 18,6 prosent, tað sama sum seinast.

Miðflokkurin stendur til at fáa fýra prosent av atkvøðunum og Framsókn 2,8 prosent.

17,3 prosent av teimum spurdu svara, at tey fara ikki á val, og 7,8 prosent siga seg ikki vita, hvønn tey skulu velja.