Republikanarar hava vunnið umboðsmannatingið

Republikanski flokkurin í USA hevur tryggjað sær meiriluta í umboðsmannatinginum eftir miðvalið 8. november.

Tað skrivar tíðindastovan AP, og samstundis boða aðrir miðlar frá tí sama. 

Tað er ikki nøkur veljarakanning, sum vísir úrslitið, men AP hevur gjørt eina niðurstøðu, eftir at republikanska valevnið, Mike Garcia, vann á demokratinum, Christy Smith, í Kalifornia.

Niðurstøðan er, at republikanararnir hava fingið 218 av teimum 435 sessunum í umboðsmannatinginum. Og tí hava republikanararnir nú meiriluta í umboðsmannatinginum.

Úrslitið hevur uttan iva við sær, at amerikanska fólkið næstu tvey árini fer at vera vitni til polittiskar ósemjur, tí demokratarnir hava longu tryggjað sær meirilutan í hinum kamarinum í kongressini, senatinum.