Macron vil veita Russlandi trygd aftur fyri samráðingar við Ukraina

Eitt uppskot frá franska forsetanum, Emmanuel Macron, um at Russland skal fáa vissu fyri trygd, um landið afturfyri fer til friðarsamráðingar við Ukraina, er ikki fallið í góða jørð í fleiri londum.

Ukraina og baltisku londini, sum hava felags landamark við Russland vilja ikki vita av uppskotinum.

- Tað, sum heimurin hevur brúk fyri, er, at Russland veitir trygd, og ikki øvut, sigur ráðgevin hjá ukrainska forsetan, Zelensky, Mykhailo Podoljak, sambært Reuters.

Eisini Finnland er ósamt við Macron um uppskotið. 

Finski forsætisráðharrin, Alexander Stubb, sigur, at hann er grundleggjandi ósamdur við Macron.

- Einastu vissu um trygd, sum vit skulu hugsavna okkum um, er tey ikki-russisku. Russland skal fyrst veita vissu fyri, at tað ikki loypur á onnur, skrivar hann á Twitter.

Litavski uttanríkisráðharrin, Linas Linkevicus, sigur, at Russland fær trygd so leingi, sum tað ikki loypur á onnur, innlimar og hertekur grannalond.

Ukraina: Russland skal taka seg aftur

Í Kyiv sigur Davyd Arakhamia, sum situr í ukrainska tjóðartinginum, og sum var við í fyrru samráðingunum við Russland í Istanbul, at Ukraina er sinnað at veita Russlandi trygd við ávísum treytum. Tær eru: 

- at Russland tekur seg aftur úr ukrainskum øki
- at Russland rindar fyri skaðarnar
- og at Russlad letur frá sær øll kjarnorkuvápn.

- Tá ið hetta er gjørt, eru vit til reiða at sessast við samráðingarborðið og tosa um garanti, sigur Davyd Arakhamia.