Sjálvstýrisflokkurin í Streymoynni tekur ikki við tunnilsuppskotinum

Heldur ikki í egnum flokki hevur landsstýrismaðurin í innlendismálum undirtøku fyri mannagongdini í málinum um Eysturoyartunnilin.

Streymoyar Sjálvstýrisfelag kolldømir ikki uppskotið hjá formanni floksins um privatu loysnina. Men felagið undrast á, at løgtingið viðger eitt lógaruppskot, sum so nógv óvissa og ivamál eru um.

Streymoyar Sjálvstýrisfelag tekur undir hesum umstøðum ikki undir við, at løgtingið samtykkir tunnilsmálið á verandi grundarlagi.

Tinglimurin hjá Sjálvstýrisflokkinum, Jógvan Skorheim, segði við Útvarpið í gjár, at hann stuðlar Kára P. Højgaard. Hann dugir ikki at síggja nakra aðra loysn enn at lata privat gera Eysturoyartunnilin.