Psykiatriskir sjúklingar skulu hava betri rættindi

Broytingar eru gjørdar í donsku lógunum um "anvendelse af tvang i psykiatrien."

Tí er neyðugt dagføra føroyska lógarverkið, so samsvar er millum lógirnar í Danmark og í Føroyum.

Heilsumálaráðið hevur sent til hoyringar ætlaðu broytingarnar, sum eru í uppskoti um ríkislógartilmæli.

Betri rættindi

Endamálið við uppskotinum er at betra um rættindi hjá sjúklingum, sum eru í Psykiatriska deplinum í Landssjúkrahúsinum.

Teir skulu hava betri rættindi, tá tvingsil verður brúkt í sambandi við viðgerð. 

Og Føroya kærustovnur kemur í staðin fyri "Det Psykiatriske patientklagenævn" 1. juli í ár. Galdandi lóggáva í Føroyum kom í 2009 og er broytt eina ferð, tað var í 2012.

Mett verður, at nýggja fyriskipanin fer at kosta landinum 140.000 kr. um árið. Í ár fer hon at kosta 70.000 kr, tí lógarbroytingarnar skulu koma í gildi 1. juli.