5.021 bilar koyrdu í Eysturoyartunlinum um dagin í fjør

5.021 bilar koyrdu í Eysturoyartunlinum í miðal hvønn dag í fjør.

Tað eru 573 fleiri bilar í miðal um dagin samanborið við 2021. Tá koyrdu 4.448 akfør í miðal.

Tað vísa tøl hjá tunnilsfelagnum.

Teitur Samuelsen, stjóri í Eystur- og Sandoyartunlum, segði við útvarpið stutt fyri jól, at ferðslan í Eysturoyartunlinum skal vaksa 2200 bilar um samdøgrið, áðrenn tað fer at hanga saman fíggjarliga. 

Í desember koyrdu 5.169 bilar í tunlinum um samdøgrið afturímóti 4.619 í 2021.

Minni ferðsla í hinum tunlunum

Ferðslan í Norðoyartunlinum minkaði í desember.

3.415 bilar koyrdu í tunlinum um samdøgrið í desember. Í desember í 2021 koyrdu 3.984 akfør ígjøgnum um samdøgrið.

Ferðslan í Vágatunlinum er eisini minkað í desember samanborið við desember í 2021.

2007 bilar koydu ígjøgnum um samdøgrið í desember í fjør, meðan talið var 2250 í desember í 2021.