Visit Tórshavn skal hava nýggjan stjóra

Visit Tórshavn skal hava nýggjan stjóra fyri Liljuna Weihe, sum tók sæti á tingi sum varafólk fyri Tjóðveldi, tá nýggja landsstýrið var skipað.

Henny á Líknargøtu, nevndarforkvinna í Visit Tórshavn, sigur, at avgerðin at skifta stjóra er tikin í sátt og semju við verandi stjóra. 

Liljan Weihe hevur røkt starvið sum stjóri í Visit Tórshavn síðani 1. januar 2021.

Starvslýsingin eftir nýggjum stjóra verður væntandi klár í vikuni, og miðað verður eftir, at nýggi stjórin byrjar í starvi um einar tveir mánaðir.

Liljan Weihe røkir starvið, til nýggjur stjóri er settur.