Føroya Arbeiðsgevarafelag: Brot á sáttmálar verða tikin í størsta álvara

Leygardagin varð skriv lagt út á Vágaportalin, sum ákærir Føroya Arbeiðsgevarafelag fyri einki at gera við brot á sáttmálar í málinum um útlendingarnar, sum ikki fáa løn. 

Í skrivinum hjá Vágaportalinum stendur millum annað, at "antin má Vinnuhúsið taka koyrilin fram og fáa limirnar, sum felagið hevur ábyrgdina av, ganga í takt og síggja til, at teir liva upp til tað, sum verður væntað av teimum. Ella má onkur annar taka sær av tí."

Hetta vil Niels Winther, stjóri í Vinnuhúsinum, ikki hava sitandi á sær. 

Stjórin í Vinnuhúsinum heldur, at meiri kunning er rætta amboðið, um mann ynskir at minka um brotini á sáttmálar á arbeiðsmarknaðinum. 

Vinnuhúsið og útlendingastovan skipa í næstum fyri einum kunningarfundi um sáttmálaviðurskifti og lóggávu í sambandi við útlendska arbeiðsmegi. 

Eisini vera umboð frá danska SIRI, sum er Styrelsen for International Rekruttering og Integration.