Havnaruppgerð í fjórðingsfinalunum

Lagt er upp til stórdyst í fjórðingsfinalunum í kappingini um Løgmanssteypið.

B36, sum í kvøld sendi KÍ úr steypakappingini, tekur ímóti HB, sum fríggjakvøldið gjørdi tað saman við Víking. Tað er greitt eftir lutakastið á Televarpinum.


Betri ímóti 1. deild

Bæði B68 og EB/Streymur fáa mótstøðu úr næstbestu deildini í fjórðingsfinalunum.

Talan verður um grannauppgerð á Svangaskarði millum toftamenn og NSÍ, sum sostatt fær møguleikan at hevna ósigurin í fjør, ið sendi runavíkingarnar niður.

EB/Streymur tekur ímóti Skála, sum hevur fingið góða byrjan í 1. deild í ár.

Í fjórða dystinum tekur AB ímóti 07 Vestur. Lutakastið hevur við sær, at bert eitt av 'topp fýra' liðunum í Betri-deildini síðstu árini, verður við í hálvfinalunum.


Fjórðingsfinalurnar í steypakappingini (9. mai):
EB/Streymur - Skála
B36 - HB
B68 - NSÍ
AB - 07 Vestur