Løkke lurtar ikki eftir Grønlandi

Hon heldur tað vera eina sjálvfylgju, at arktiska sendifólki kemur úr Grønlandi. Og tí finst hon hvassliga at donsku handfaringini av málinum.

- Man hevur gloymt at lurta eftir Grønlandi. Hetta er eitt dømi um koloniharra-mentalitet, har Danmark dikterar uttan at spyrja fyrst, sigur Aaja Chemnitz við danska TV2.

Hon minnir á samgonguskjalið hjá donsku stjórnini, har tað stendur at ongar avgerðir viðvíkjandi Føroyum og Grønlandi skulu takast uttan at hoyra Føroyar og Grønland.

Eisini grønlendski landsstýrisformaðurin, Mute B. Egede, heldur valið av arktiskum sendifólki vera "problematiskt", og krevur ávirkan. 

Vísir øllum aftur
Lars Løkke Rasmussen, uttanríkisráðharri, vísur atfinningunum frá sær.

-Vit hava ikki landafrøðiligan uppruna sum eitt kriterie, tá vit seta fólk í donsku uttanríkistænastuni, sigur Lars Løkke Rasmussen við blaðið Politiken. 

Lars Løkke Rasmussen vil harumframt vera við, at talan er um reinan symbol-politikk frá grønlendskari síðu. Tí starvið sum arktiskt sendifólk er ein inngrógvin partur av donsku uttanríkistænastuni.

Átta lond eru við í Arktiska Ráðnum: Danmark, Finland, Ísland,, Norra, Svøríki, USA, Kanada og Russland.

Nýggi, danski sendiharrin fyri Arktis er Tobias Elling Rehfeld, sum kemur úr einum starvi sum sendimaður í Suðurafrika.