38 fregnartænastufólk á russiskum sendistovum

Russisku sendistovurnar í Norðurlondum verða brúktar sum njósnarastøðir, og nógvir heryvirmenn í russisku fregnartænastuni starvast á hesum støðum.

Russiskar sendistovur eru í Keypmannahavn í Danmark, Oslo í Noregi og Stokkhólmi í Svøríki.

Tað vísir nýggja heimildarrøðin, Skuggakríggið, sum DR, NRK, SVT og Yle hava framleitt í felag.

Nøvn eru sett á 38 fregnartænastufólk, sum seinastu árini hava arbeitt á russisku sendistovunum í Norðurlondum.

Sambært Anders Henriksen, stjóra í donsku mótnjósnaratænastuni, PET, eru russisku fregnartænasturnar sera professionellar. Tær eru dugnaligar, sera stórar og ráða yvir stórum tilfeingi, og heimildirnar røkka eisini víða.

Níggju av teimum 38 fregnartænastufólkunum, ið nøvn eru sett á, hava starvast á sendistovu í Danmark, og í minsta lagi 13 av teimum starvast enn í Norðurlondum.