Finskt Rammstein-cha cha cha og kroatiskt ellisheimsdrag

Norðurlond stóðu seg væl í fyrru hálvfinaluni í Eurovision, ið borðreiddi við øllum frá finskum cha cha cha til kroatiskt dragshow og ein floytuspælandi dvørg

Let 3 úr Kroatia og teirra "Mama ŠČ!" eru sum ein Lars von Trier-filmur. Tú kanst altíð kjakast um, hvørt hann var góður, men tú gloymir hann ongantíð.

Mynd: Ritzau / Scanpix

Uni L. Hansen

10.05.2023 - 02:08

Fyrra hálvfinalan í Eurovision-sangkappingini, ið er í Liverpool Arena við Mersey-ánna í hesum døgum, skuffaði á ongan hátt allar teir túsundtals Eurovision-fjeppararnar, sum eru komnir til enska tónleikabýin at uppliva serliga Eurovision-hýrin.

Eurovision, Liverpool, Noa Kirel

Tað vóru 'fest og farvur' í Liverpool Arena týskvøldið, ið var á tremur við veitsluhýrdum og glaðum fólkum frá gólvinum upp undir tromina.

Eurovision, Liverpool, Moldova

Og fyrra hálvfinalan hevði alt tað, ið ein kundi ynskja sær av hesi serligu sangkapping, sum ongantíð hevur verið betur umtókt, enn hon er í løtuni.

Eurovision, Liverpool, Loreen

Svøríki kom við besta poppsanginum og størstu poppstjørnuni, sjálvandi, "Tattoo" og Loreen.

Eurovision, Liverpool, Finnland

Finnland borðreiddi líka sjálvsagt við nøkrum so skítsvøkum sum Rammstein-Cha-cha-cha rútmum og dansi.

Eurovision, Liverpool, Kroatia

Og Kroatia møtti upp við einum drag-showi, ið tóktist hava sín uppruna í døgurðatímanum á einum kroatiskum ellisheimi, ella út móti morgni í onkrum brúnum vertshúsi.

Eurovision, Liverpool, Kroatia

Ja, hvat skal mann siga til Let 3 og teirra "Mama ŠČ!"?

Norðurlendskir stórfavorittar

Fleiri av størstu favorittunum at vinna Eurovision-sangkappingina í ár vóru við í fyrru hálvfinaluni.

Serliga stuttligt í ár er tann sannroynd, at allir hesir favorittar eru norðurlendskir.

Eurovision, Liverpool, Loreen

39 ára gamla Loreen úr Svøríki, sum í 2012 vann Eurovision-sangkappingina við "Euphoria", er aftur í ár spádd at enda fremst við sanginum "Tattoo".

Og tann spádómurin stendur við eftir framførsluna í fyrru hálvfinaluni, har Loreen var sera sannførandi og fekk góða móttøku frá fólkunum í Liverpool Arena.

Tað eru bara trý viðurskifti, ið kunnu seta fót fyri Loreen og "Tattoo."

Tað fyrsta er tann sannroynd, at Loreen vann Eurovision-sangkappingina í 2012, og fólk tí halda, at tað er eitt sindur moðið, at hon er við aftur í ár.

Eurovision, Liverpool, Loreen

Í øðrum føri líkist "Tattoo" í so nógv "Euphoria". "Sangirnir eru systkinabørn," heldur onkur fyri, og tað er í grundini væl sagt, tí spælt verður upp á nógvar av teimum somu tangentunum í "Tattoo" sum í "Euphoria".

Käärijä lyfti takið

Tað triðja er finski Käärijä og hansara "Cha Cha Cha".

"Cha Cha Cha" var so nógv tann best umtókti sangurin í Liverpool Arena í gjárkvøldið, og tað er ikki ov nógv sagt, at takið hevði hug at lyfta seg uppfrá teir tríggjar minuttirnar, sum "Cha Cha Cha" hjá Käärijä er til longdar.

Eurovision, Liverpool, Noreg

Eisini norska Alessandra og hennara fantasy-sangur "Queen of Kings" stóð seg væl í myndini.

Alessandru verður spátt eitt sætta pláss, meðan Svøríki og Finnland enda á fyrsta og øðrum plássi sambært spádómarunum.

Ísraelskt og kekkisk poppsprund

Norðurlendsku sangirnir sleppa tó ikki at avgera alt sínámillum, tí í fyrru hálvfinaluni vóru fleiri sangir, ið eisini kunnu gera seg galdandi í finaluni.

Eurovision, Liverpool, Noa Kirel

Serliga ísraelska poppsprundið Noa Kirel og sangurin "Unicorn" fingu sera góða móttøku í Liverpool Arena.

Eurovision, Liverpool, Noa Kirel

"Do you wanna see me dance?" spyr Noa Kirel í sanginum "Unicorn", og svarið í Liverpool Arena var eitt greitt ja!

Eurovision, Liverpool, Vesna

Girlpower-sangurin "My Sister's Crown" hjá kekkiska folk-kvinnubólkinum Vesna talaði væl til áhoyrarafjøldina bæði á gólvinum og uppi á sitiplássunum í Liverpool Arena.

Eurovision, Liverpool

Pasha Parfeni úr Moldova fekk eisini lív í áhoyrararnar í Liverpool Arena í gjárkvøldið við sínum sangi "Soarele și Luna". Framførslan hevði alt frá vøkrum sprundum og duldarfullum myndum til ein floytuspælandi dvørg.

So veit mann, at mann er til Eurovision-sangkappingina.

Rani hevur góðar vónir

Størsti spenningurin millum føroyingar er sjálvandi, hvussu tað fer at gangast Rana Petersen úr Havn, sum hósdagin skrivar føroyska tónleikasøgu, tá ið hann sum fyrsti føroyingur higartil trínur á Eurovision-pallin við sanginum "Breaking My Heart".

Rani Petersen, sum spælir tónleik undir navninum Reiley, hevur góðar vónir til seinnu hálvfinaluna hóskvøldið. Rani heldur seg hava eina av størstu pallsetingunum av øllum í ársins Eurovision-sangkapping.

Hesum greiddi Reiley frá í tíðindunum í gjárkvøldið.

Reiley_um_Eurovision_09052023

Ein longri samrøða verður eisini við Reiley í "Góðan morgun Føroyar."

Veddingarfyritøkurnar eru tó ikki so sannførdar, sum Reiley sjálvur er, tí hann liggur á vippuni til at sleppa við í finaluna, sum verður leygarkvøldið.

Føroyar høvdu ikki smæðst burtur

Sirið Stenberg, landsstýriskvinna við mentamálum, verður millum áskoðararnar til seinnu hálvfinaluna í Liverpool Arena hóskvøldið.

Málið hjá Sirið Stenberg, landsstýriskvinnu, er at arbeiða fyri føroyskum EBU-limaskapi, tí Føroyar eru ein partur av altjóða samfelagnum, og tað er umráðandi, at Føroyar eisini vísa seg fram.

Hesum greiddi hon frá í Degi og viku:

230509_DV_EUROVISION

Og út frá tí, sum var at hoyra í fyrru Eurovision-hálvfinaluni í Liverpool Arena, so høvdu føroysk tónlistafólk á ongan hátt smæðst burtur, tí stigið á sangunum og framførslunum var á ongan hátt ræðandi høgt.