Blinken og Gang avtalað at hittast aftur

Amerikanski uttanríkisráðharrin, Antony Blinken, er í hesum døgum á almennari vitjan í Kina, og í gjár hevði hann fund við kinesiska uttanríkisráðharran, Qin Gang, í Beijing. 

Á fundinum, sum vardi hálvan sætta tíma, gjørdi Qin Gang greitt, at Taivan er sjálvur kjarnin í kinesiskum áhugamálum, og er eisini størsta vandamálið í viðurskiftunum millum Kina og USA.

Eisini var semja gjørd um at økja handisligu flogferðsluna millum londini bæði.

Báðir uttanríkisráðharrarnir søgdu, at talan hevði verið um eina opna og konstruktiva samrøðu teirra millum, og at tørvur er á støðugum viðurskiftum millum Kina og USA.

Tí hava teir báðir avtalað at hittast aftur í Washington. Enn er tó ikki ásett, nær tað verður, skrivar Reuters.