Taptu við trimum málum

Føroyska U21-landsliðið í hondbólti tapti 30-27 fyri Serbia í Berlin fyri løtu síðani. Hálvleiksstøðan var 17-12.

Serliga í fyrra hálvleiki gekk illa hjá føroyska liðnum, men eftir eina trilvandi byrjan í seinna hálvleiki fingu føroyingar fótin fyri seg, og vit sóu nakað av tí góða spælinum, sum føroyska liðið hevur víst fyrr í kappingini.

Men hóast Føroyar fingu minkað munin úr átta málum niður í tvey mál eina løtu, eydnaðist tað ikki av álvara at hótta serbisku leiðsluna.

Sostatt verður tað Serbia, sum skal spæla hálvfinalu, og Føroyar skulu spæla um plássini frá nummar 4 til nummar 8.