U21: Føroyar hitta Danmark

U21-manslandsliðið skal reisa seg aftur, eftir ein illa spældan fyrra hálvleik í fjórðingsfinaluni ímóti Serbia í gjár, sum kostaði Føroyum sigurin og harvið møguleikan fyri heiðursmerki. 

Føroysku leikararnir vóru annars ósigraðir frammanundan fjórðingsfinaluni við fimm vunnum dystum í slag. 

Nú skulu teir sonevndu plaseringsdystirnir avgreiðast, har dystast verður um plássini millum átta og fimm.

Fyrsti dysturin hjá Føroyum er ímóti Danmark, sum tapti fyri Týsklandi í sínari fjórðingsfinalu í gjár. Um Føroyar vinna, skal spælast um fimta plássið ímóti annaðhvørt Kroatia ella Portugal. 

Dysturin ímóti dønum er fyrrapart í morgin klokkan níggju. 

Kringvarpið vísir dystin.