Grønland: Kjakið um virðisøking í fiskivinnuni kyknað aftur

Í Grønlandi er kjakið um virðisøking í fiskivinnuni kyknað aftur, eftir at grønlendski fólkatingslimurin, Aki-Mathilda Høegh-Dam, í fleiri førum hevur víst á, at Danmark fær ein stóran part av grønlendska blokkstuðlinum aftur gjøgnum tað búskaparliga virksemið, sum útflutningurin av grønlendskum fiski og skeljadjórum skapa í Danmark.

Nú sigur formaðurin í grønlendska búskaparráðnum, Torben M. Andersen, við blaðið Sermitsiaq, at hann hevur ikki sæð nakrar álítandi útrokningar, sum stuðla undir hetta uppáhaldið. 

Grønland fær umleið fýra milliardir krónur um árið úr Danmark í blokkstuðli.

Torben M. Andersen vísir tó á, at tað ber til at skapa eina størri virðisøking í grønlendska samfelagnum.

Aki-Matilda Høegh-Dam

AkI-Mathilda Høegh-Dam er fólkatingskvinna.

Ikki binda meira enn neyðugt

Hann sigur tað hava týdning ikki at binda meira kapital og arbeiðsmegi í fiskivinnuna enn neyðugt. Tí ber til at leysgeva bæði kapital og arbeiðsmegi úr grønlendsku fiskivinnuni til aðrar vinnur og harvið skapa virðisøking tann vegin, sigur Torben M. Andersen, sum eisini er professari í búskaparfrøði á universitetinum í Aarhus.

Viðvíkjandi týdninginum av blokkstuðlinum, sigur formaðurin í grønlendska búskaparráðnum, at tað eru tveir møguleikar at minka tann týdningin. 

Annar er at skapa eitt breiðari vinnugrundarlag og ein størri búskap, so lutfalsligi týdningurin av blokkstuðlinum minkar so líðandi.

Torben M. Andersen - Mynd: Sermitsiaq

Torben M. Andersen formaður í grønlendska búskaparráðnum, heldur, at ein møguleiki er at gera sum Føroyar: at minka ella frysta blokkin. (Mynd: Sermitsiaq)

Minka ella frysta blokkin

Hin møguleikin er at gera sum Føroyar og minka ella frysta blokkstuðulin, sigur Torben M. Andersen við Sermitsiaq.

Grønland skal hava eina nýggja fiskivinnulóg, men lógin hevur verið leingi á veg.

Í januar segði Karl Tobiassen, landsstýrismaður í fiskivinnumálum, at ætlanin er at leggja nýggju lógina fyri tingið í heyst.