Kornavtalan verður ikki longd

Avtalan millum Russland og Ukraina um kornflutning tvørtur um Svartahavið verður ikki longd.

Tað eru boðini úr Kreml, skrivar Reuters.

Kornavtalan er galdandi til klokkan 10 í kvøld, okkara tíð.

Avtalan hevur tryggjað, at bæði londini kunnu útflyta korn, meðan kríggið herjar.

Matvørukreppa

Avtalan kom í lag eftir at bæði ST og Turkaland komu upp í samráðingarnar í juli í fjør, til tess at sleppa undan altjóða matvørukreppu.

Ukraina og Russland eru millum størstu útflutningslond av korni í heiminum.

Russland hevur fleiri ferðir hótt við at taka seg úr avtaluni, tí russisk krøv eru ikki eftirlíkað. Russland hevur eisini funnist at, at fátæku londini hava ikki fingið nóg mikið av korni.

Ógreitt er, um Russland hevur tikið seg úr avtaluni fyribils ella med alla.