Donsk fólkaatkvøða um koranbrenningar

Danska stjórnin ætlar at forbjóða almennum koranbrenningum uttan fyri sendistovur. 

Men Morten Messerschmidt í Danska Fólkaflokkinum og Pernille Vermund í Nýggju Borgarligu mæla nú til eina fólkaatkvøðu í eini roynd at steðga ætlanini hjá donsku stjórnini at forbjóða almennum koranbrenningum uttan fyri sendistovur.

Tað siga floksleiðararnir við avísina Berlingske Tidende.

Tað ber til at senda eitt lógaruppskot til fólkaatkvøðu, eftir at tað er samtykt, um ein triðingur av fólkatingslimunum krevur tað, skrivar danska kringvarpið, DR.

Meiriluti fyri at forbjóða koranbrenningum

Sum er, er meiriluti fyri uppskotinum hjá donsku stjórnini at forbjóða almennum koranbrenningum.

Tilsamans sjey flokkar við 72 tingsessum halda ikki, at danska stjórnin eigur at boyggja seg fyri trýsti frá muslimsku londunum, ið vilja hava forboðið.

Tað vil siga, at tey eru sjey tingsessir frá at fella uppskotið hjá stjórnini, tá ið tað kemur fyri í fólkatinginum.

Mánadagin høvdu 57 muslimsk lond fund um málið, har tey fordømdu koranbrenningarnar í bæði Danmark og Svøríki.

Eisini gjørdu tey av, at hvørt landið sær kann taka støðu til koranbrenningarnar.