Óli Mittún tvífaldan heiður

Spania gjørdist heimsmeistari við at vinna 28-23 á Danmark í finaluni, og tað sást eisini aftur, tá ið All-Star liðið skuldi kjósast, tí ikki færri enn tríggir spaniólar vóru við.

Danmark tapti finaluna, men fekk tó besta høgra bakk og besta spælara í HM-endaspælinum í Kroatia, sum í hálvaaðru viku fevndi um tilsamans 116 dystir, áðrenn alt var liðugt.

Føroyar endaðu sum nummar átta og fingu sostatt eitt góðkent úrslit, har hyggjast kann aftur á smáar løtur í fleiri av dystunum, ið endaðu við at avgera til fyrimuns fyri mótstøðuliðini. Men samanlagt var føroyska liðið ein stór uppliving!

Ikki minst kunnu vit vera errin av, at okkara Óli Mittún varð kosin besti spælskipari, umframt at hann var toppskjútti við 87 málum, sum vóru 31 mál fleiri enn tann næstfremsti, umframt at hann legði upp til 70 onnur mál, sum var 27 meira enn tann næstfremsti har.

Hetta er aðru ferð í summar, at Føroyar fáa spælara við á All-Star liðið, tí sama heiður fekk Elias Ellefsen á Skipagøtu í HM-endaspælinum hjá U21-landsliðunum, har hann eisini gjørdist toppskjútti.

All-Star liðið í HM í Kroatia 2023:
Málmaður: Alvaro Perez Mendez (Spania)
Høgri vongur: Xavier González Unciti (Spania)
Høgri bakkur: Lasse Sunesen Vilhelmsen (Danmark)
Spælskipari: Óli Mittún (Føroyar)
Vinstri bakkur: Aleksandar Čaprić (Kroatia)
Vinstri vongur: Belal Masoud (Egyptaland)
Strikuspælari: Victor Romero Holguin (Spania)

Toppskjútti: Óli Mittún (Føroyar) – 87 goals

Besti spælari: Frederik Emil Pedersen (Danmark)