Raðfestingar krevja sparingar aðrastaðni

Pengar mugu finnast til raðfestingarnar, sum landsstýrið ætlar. Tað merkir, at pengar skulu sparast aðrastaðni.

Tað staðfestir landsstýriskvinnan í fíggjarmálum, Ruth Vang. 

Í Breddanum í gjár segði Djóni Nolsøe Joensen, landsstýrismaður í barna- og útbúgvingarmálum, at tá ið næmingar fara í fólkaskúla aftur eftir summarfrítíðina næsta ár, skulu ikki fleiri enn 20 næmingar vera í hvørjum skúlaflokki.

Sambært álitinum, sum landsstýrismaðurin fekk handað fyrr í summar, kostar hendan broytingin 36,8 milliónir krónur. 

skúlanæmingar, fólkaskúlin, skúlabørn, skúlar

At hava 20 næmingar í skúlaflokkunum verður mett at kosta umleið 37 mió. kr. (Savnsmynd: Bjarni Árting Rubeksen)

Og tað legst aftrat øðrum kostnaðarmiklum ætlanum hjá samgonguni, so sum lønarlyft, styttri arbeiðsviku og skattalætta til lág- og miðallønt.

Og tá hugt verður at inntøkunum, hevur Hans Ellefsen, búskaparfrøðingur, sagt í útvarpstíðindunum, at inntøkurnar frá tøkugjaldinum minka í ár.

Ruth Vang sigur, at ætlanirnar hjá landsstýrinum skulu ikki fíggjast við tí, sum kemur meira í kassan. Heldur er ætlanin at skerja aðrastaðni. 

Og landsstýrisfólk vita, at einki verður gjørt, um fígging ikki er fingin til vega.

Hoyr innslag í útvarpstíðindunum: