Pepsi komið á svartalista hjá Ukraina

Flogfelagið SAS gevst nú við at selja Pepsi. Tað váttar fjølmiðlastjórin hjá SAS, Tonje Sund, fyri norska TV2.

Orsøkin er, at PepsiCo, sum framleiðir Pepsi-drykkin, er komið á svartalista hjá Ukraina yvir fyritøkur, sum sambært ukrainskum myndugleikum stuðla russisku krígsførsluni.

Sambært Tonje Sund hevur Pepsi ongantíð verið til sølu umborð á flogførunum hjá SAS, men tað hevur borið til at fáa Pepsi í hølunum hjá SAS í floghavnini í Oslo. Men tað er nú broytt, so einki Pepsi verður at fáa har heldur.

Fyrr í ár gavst SAS av somu orsøk við at selja sjokolátu frá Marabou, sum fyritøkan Mondelez eigur. Eisini Mondelez stendur á svartalista hjá Ukraina.