Norðurkorea ætlar at hjálpa Russlandi við vápnum

Norðurkoreiski leiðarin, Kim Jong-un, fyrireikar eina ferð til Russlands, har hann seinni í hesum mánaðinum fer at hitta russiska forsetan, Vladimir Putin. 

Tað siga keldur við The New York Times.

Málið við ferðini er at tosa um møguleikan at veita Russlandi fleiri vápn til kríggið í Ukraina og annað hernaðarligt samstarv, siga ónevndar keldur við blaðið í dag.

Keldurnar eru á embætismannastigi í USA og sameindum londum.

Um so verður, fer Kim Jong-un, sum sjáldan ferðast út um norðurkoreiska høvuðsstaðin, Pyongyang, helst við stálstyrktum toki til Vladivostok við kyrrahavsstrondina í Russlandi, har hann fer at hitta Putin, siga embætisfólkini. 

Brævaskifti um vápnaavtalu

Kim kann kanska eisini fara til Moskva, men tað er ikki avgjørt enn.

Hann ætlar eisini at vitja Pier 33, har hernaðarligi kyrrahavsflotin hjá Russlandi liggur við bryggju.

Í gjár ávaraðu Hvítu húsini um, at Putin og Kim høvdu sent hvør øðrum brøv, har teir nevndu møguliga vápnaavtalu. 

Upplýsingarnar hava Hvítu húsini frá fregnartænastuni.

Talsmaðurin hjá Putin, Dmitrij Peskov, vil hvørki vátta ella avsanna brævaskiftið, men sigur, at Russland vil menna viðurskiftini við Norðurkorea.