Rúsdrekkabroyting uttan Old

Í samgonguskjalinum er boðað frá tveimum ítøkiligum broytingum í rúsdrekkalógini. 

"Bryggjarí og brennarí fáa loyvi at selja egna framleiðslu í egnum sølubúðum" og "Matstovuvinnan fær loyvi at innflyta vín og øl beinleiðis."

Lógaruppskotið um at bryggjarí og brennarí skulu sleppa at selja egna framleiðslu var til 1.viðgerð í løgtinginum í vikuni. Men lógaruppskotið hjá Bjarna Kárason Petersen, landsstýrismanni í lógarmálum, fekk tá harða mótstøðu frá samgongutingliminum Henrik Old.

Henrik Old ger púra greitt, at hann fer at atkvøða ímóti. 

Seinna broytingin í rúsdrekkalógini, sum landsstýrið ætlar at fremja, verður væntandi borin í løgtingið til várs, sigur Bjarni Kárason Petersen. Tá skal matstovuvinnan fáa loyvi at innflyta vín og øl beinleiðis, uttanum Rúsdrekkasølu Landsins.

Eisini ta broytingina er Henrik Old harðliga ímóti, og eisini tá fer hann atkvøða NEI.

Samgongan telur 18 tingfólk, og tí er atkvøðan hjá Henrik Old ikki avgerandi. Og sambært landsstýrismanninum sleppur Henrik Old at atkvøða sum honum lystir í hesum málinum. Men restina av samgonguni ætlar tó at fremja tey í verki, sigur Bjarni Kárason Petersen.