KÍ fimm minuttir í dreymalandi - Klæmint skoraði tvey fyri Breiðablik

Klaksvíkingar vóru í Conference League-dreymalandi eina løtu. 

Beint eftir steðgin legði Deni Pavlovic KÍ framum eftir knallhart horna frá Árna Frederiksberg við gylta vinstra beininum, og so hómaðist enn eitt evropeiskt stórúrslit.

Soleiðis skuldi kortini ikki verða - ikki hesa ferð - tí leiðslan helt bert í fimm minuttir. Tá javnaði Vladimir Weiss, og eitt korter fyri leiklok skeyt Aleksandar Cavric sigursmálið fyri Slovan Bratislava.

KÍ hevði fleiri góðar royndir síðstu løtuna, men tað eydnaðist ikki at javna ímóti heimaliðnum, sum tískil fekk trý stig og legði seg undir liðina á Lille, sum vann á Olimpia Lublijana í gjár.


Klæmint skoraði tvey í Breiðablik-tapi

Klaksvíkingar vóru ikki einastu føroyingarnir í Conference League hóskvøldið.

Íslendsku meistararnir, Breiðablik, við Klæminti Andrasson Olsen í byrjanaruppstillingini, settu hol á sítt bólkaspæl ímóti Maccabi Tel Aviv, og føroyski framherjin gjørdi veruliga vart við seg.

Hann minkaði um munin tvær ferðir, men tað eydnaðist ikki at javna, og ísraelar fóru tískil við øllum trimum stigunum. Málini hjá Klæminti Andrasson Olsen vóru tey fyrstu hjá einum íslendskum felag í evropeiskum bólkaspæli.