Framvegis langt millum partarnar

- Partarnir standa eins langt frá hvørjum øðrum í dag, sum tá ið teir fóru í verkfall.

Tað sigur Terje Sigurðsson, semingsmaður, sum fyrrapartin hitti Felagið Føroyskar Sjúkrarøktarfrøðingar.

Hann sigur, at einki nýtt kom fram á fundinum fyrrapartin.

Tað, sum vanliga hendir í slíkum málum, er, greiðir semingsmaðurin frá, at tá ið samráðingarnar ikki ganga eftir vild og føra til semju, senda partarnir boð eftir Semingsstovninum..

- Viðhvørt hjálpir tað, sigur hann.

Trýsta 

Partarnir brúka eisini konfliktina til at trýsta hvønn annan, og tað er júst tað, Lønardeildin hjá Fíggjarmálaráðnum og Felagið Føroyskir Sjúkrarøktarfrøðingar gera í løtuni.

- Eftir øllum at døma hava partarnir ikki trýst hvønn annan nóg leingi enn, sigur Terje Sigurðsson.

- Enn er so einki hent, sum hevur við sær, at samráðingarnar verða tiknar uppaftur, ella at nakað semjuskjal kann skrivast, sigur Terje Sigurðsson, semingsmaður.

- Men vilja partarnir hava okkum inn aftur í myndina, seta tey seg í samband við okkum, leggur hann afturat.

Verkfallið hert

Klokkan átta í morgun var verkfallið hjá sjúkrarøktarfrøðingunum víðkað til at fevna um ambulatoriini á Suðuroyar Sjúkrahúsi og á Klaksvíkar Sjúkrahúsi.

Verkfallið byrjaðil mánadagin 2. oktobur.