Føroyar fingið altjóða judodómara

Um vikuskiftið fekk Andrias Sumberg prógv sum altjóða dómari í judo. Hann er fyrsti føroyingur, sum fær altjóða prógv, skrivar Judo Føroyar.

Andrias Sumberg hevur vant judo, síðani hann var smádrongur, og undir lestri í Danmark byrjaði hann at royna seg sum dómari, har hann tók dómaraprógv. Andrias Sumberg hevur, síðani hann kom heim aftur, stovnað Suðuroyar Judo á Tvøroyri, har hann eisini er formaður og venjari.

Seinnu árini hevur hann dømt í norðurlendskum kappingum, og í fjør byrjaði hann tilgongdina at gerast altjóða dómari. Seinasta heyst dømdi hann í tveimum altjóða kappingum, og í summar hevur hann eisini dømt í tveimum altjóða kappingum, áðrenn hann nú um vikuskiftið var uppi til próvtøku í sambandi við European Cup kapping í Malaga í Spania.

Andrias Sumberg kláraði próvtøkuna uttan trupulleikar og kann nú kalla seg altjóða dómara.

Tað hevur stóran týdning fyri Judo Føroyar, at døming er á høgum stigi, og Andrias Sumberg kemur frameftir eisini at hava ein týðandi leiklut í at læra nýggjar dómarar í Føroyum, eins og hann fær altjóða uppgávur.

Á myndini eru Henri Petteri Mylly úr Finnlandi, Svenja Rahn Sørensen úr Noreg, sum er fyrsta norska kvinna, ið gerst altjóða dómari, og Andrias Sumberg, sum er fyrsti føroyingur, ið gerst altjóða dómari.