Fýra andstøðuuppskot fáa fyrstu viðgerð

Fýra andstøðuuppskot hava fyrstu viðgerð á tingfundinum í dag.

Fólkaflokkurin eigur tvey, Sambandsflokkurin eitt, og allir triggir andstøðuflokkarnir eiga eitt uppskot.

Fólkaflokurin vil, at útróðrarbátar minni enn 15 tons varðveita veiðiloyvið og fiskiloyvini til 1.januar 2036 í staðin fyri til 2034.

Og hann mælir til at broyta landsskattastigan, sum ikki er broyttur síðani 2016. Flokkurin vil hvørt ár javna mørkini í landsskattastiganum. Fólkaflokkurin hevur uppskot um, at skattastigin fyri 2024 verður javnaður fýra prosent. 

Bygnaðarbroytingar

Sambandsflokkurin hevur uppskot um bygnaðarnevnd.

Nevndin skal kanna, hvørjir møguleikar eru í almenna geiranum at gera neyðugar bygnaðarbroytingar, nýskipanir og betri almennar tænastur.

Og teir tríggir andstøðuflokkarnir mæla til at størsta útgjald úr Barsilsskipanini hækkar 3.000 krónur, úr 25.000 krónum upp í 28.000 krónur um mánaðin.

Ingilín Didriksen Strøm, landsstýriskvinna, skal svara skrivligum fyrspurningi frá Helga  Abrahamsen, løgtingsmanni, um vinndorku á tingfundinum í dag, sum byrjar klokkan ellivu.

.