Birita Mohr fekk Serstøku virðisløn landsins 2023

Sirið Stenberg, landsstýriskvinna í mentamálum, hevur júst kunngjørt, at Birita Mohr, sjónleikari, fær Serstøku virðisløn landsins 2023. 

Hetta hendi á samkomu í Miðnámsskúlanum í Vestmanna, har mentanarvirðislønir landsins verða handaðar. 

Í síni grundgeving legði Sirið Stenberg, landsstýriskvinna, áherðslu á, at Birita Mohr legði, saman við øðrum undangongufólkum, lunnar undir yrkisleiklistina í Føroyum, tá tey settu á stovn yrkisleikbólkin Grímu. 

Landsstýriskvinnan vísti á, at leikbólkurin Gríma lyfti sjónleikin í Føroyum á eitt yrkislistaligt stig og skapti eitt umhvørvi fyri yrkisleiklistina í Føroyum.

Birita Mohr virkaði sum leikari, leikstjóri, undirvísari, høvundur, framleiðari og samskipari í leikbólkinum, eins og hon gav eitt megnar íkast sum kveikjari, undirvísari og leikstjóri í áhugafeløgunum kring landið.

Sirið Stenberg, Mentanarvirðislønir landsins 2023

Megnar allar genrur

Sum sjónleikari megnar Birita Mohr allar genrur; líka frá tí ekspressiva úttrykkinum til psykologiska realismu, har Birita á nemandi hátt lýsir tær heilt niðurtónaðu, inniligu kenslurnar í mannalyndinum.

Birita Mohr hevur havt týðandi leiklutir í eini langari røð av leikum, eitt nú í leikunum "Antigone" í Norðurlandahúsinum í 1989, "Glataðu Spælimenninir" í Norðurlandahúsinum í 1993, "Kirsuberjagarðurin" á Tjóðpalli Føroya í 2010 og "Reinsan" á Tjóðpalli Føroya í 2011. 

Birita Mohr

Tað var serstakt at uppliva Biritu Mohr í høvuðsleiklutinum í sjónleikinum "Lear kongur" eftir William Shakespeare, sum leikbólkurin Det Ferösche Compagnie setti á pall í Sjónleikarhúsinum í Havn á sumri 2023. 

Hetta var ein serstøk verkætlan, ið setur spurningin: Kann ein sjónleikarakvinna við niðursettum minni spæla sjónleik?

Mentanarvirðislønir landsins 2023, Birita Mohr, Egi Dam

Birita Mohr hevur sett varðar eftir seg á føroyska leiklistapallinum og fær fyri avrikini Serstøku virðisløn landsins 2023, segði Sirið Stenberg, landsstýriskvinna í mentamálum.