Eilif Samuelsen fekk Heiðursgávu landsins 2023

Sirið Stenberg, landsstýriskvinna í mentamálum, hevur júst latið Eilif Samuelsen, týðara, Heiðursgávu landsins 2024. 

Heiðursgáva landsins er 75.000 krónur, og hon verður latin teimum, ið hava virkað til frama fyri mentanarlig virði, sum hava týdning fyri føroyska mentan, list og mentanararv.

Eilif Samuelsen er útbúgvin lærari, og virksemi hansara sum týðari tók dik á seg í 2004, tá forlagið Hemlið gav út "Játtanir Augustinusar" eftir Aurelius Augustinus í føroyskari týðing.  

Mentanarvirðislønir landsins 2023

Ein røð av klassiskum bókmentum

Síðan hevur Eilif Samuelsen latið eina langa røð av klassiskum bókmentum í føroyskt mál.

Bøkur eftir Aristoteles, Platon, Montaigne, Machiavelli, Løgstrup og Lagerkvist eru millum heimsbókmentirnar, ið Eilif hevur týtt og givið út á egnum forlagi.

Nýggjasta útgávan er týðingin av bókini "Um stutta lívið og onnur rit" eftir stoiska heimspekingin Seneca, sum kom út á føroyskum í mai 2023.

At kunna lesa Platon og Aristoteles á føroyskum er ikki nøkur sjálvfylgja. Tað er ein gáva til okkum øll, og er at takka eldsálini og kappanum Eilifi Samuelsen fyri.

Fyri mentanarligu avrikini fær Eilif Samuelsen Heiðursgávu landsins 2023.