- Tíðindi, mentan og ítróttur
Teitur Lassen fekk Mentanarvirðisløn landsins 2023
![](https://kvf.fo/sites/default/files/styles/grein-ovasta-mynd/public/_dsc5985.jpg?itok=3lbMz8ue)
Sirið Stenberg, landsstýriskvinna í almanna- og mentamálum, hevur júst handað Teiti Lassen, tónlistamanni, Mentanarvirðisløn landsins fyri 2023.
Mentanarvirðisløn landsins, sum er 150.000 krónur, verður latin fyri at heiðra føroyskt mentafólk sum tøkk fyri útint listarligt avrik.
Í síni grundgeving, staðfestir Sirið Stenberg, landsstýriskvinna í mentamálum, at Teitur Lassen er fjølgávaður tónlistamaður, tónasmiður, yrkjari, tónleikari, sangari og framleiðari.
Eyðsýndar gávur
Tónlistagávurnar vóru eyðsýndar longu í tannáringaaldri.
Heimliga gjøgnumbrotið á tónleikapallinum kom til Prix Føroyar í 1995 við poppbólkinum Mark No Limits. Omanfyri sæst framførslan hjá Mark No Limits í fyrstu Prix Føroyar-finaluni.
Árið eftir, í 1996, kom útgávan "Mark No Limits", sum hevði sína serstøku og seinni so eyðkendu ljóðmynd.
Sum singer/songwriter hevur Teitur havt hugbindandi og nærverandi konsertir kring heimin í meir enn 20 ár.
Stóra altjóða gjøgnumbrotið kom við útgávuni "Poetry & Aeroplanes" í 2003, sum framvegis stendur sum ein tónlistaligur varði við sangum sum "I Was Just Thinking", "Josephine" og "One And Only".
Ein lýsandi stjørna
Millum aðrar týðandi útgávur eru "Káta Hornið" frá 2007, har Teitur yrkir og syngur á føroyskum, "Let the Dog Drive Home" frá 2010 og "I Want to be Kind" frá 2018.
Hóast ljóðmyndin framvegis er hin eyðkenda, er Teitur alsamt leitandi og kannandi á síni leið gjøgnum tónleikin.
Teitur er ein lýsandi stjørna á føroyska tónleikapallinum.