Íslendskar kvinnur fara í verkfall í dag

Í dag fara íslendskar kvinnur hvørki til arbeiðis, at arbeiða heima ella at ansa børnum. Í staðin fara tær út á gøturnar at krevja javnrættindi.

Hetta er uppfylging av einum søguligum verkfalli, har íslendskar kvinnur sama dag í 1975 løgdu landið lamið fyri at gera greitt teirra stóra týdning fyri samfelagið og familjuna.

Verkfallið í dag hevur stuðul frá meira enn 40 ymiskum feløgum, og verður eisini stuðlað av íslendska forsætisráðharranum, Katrini Jakobsdóttir, sum ikki fer á nakran fund í dag. 

Katrin Jakobsdóttir

Katrin Jakobsdóttir, forsætisráðharri, fer eisini í verkfall í dag. 

Eiga ikki at missa løn

Íslendska stjórnin hevur flutt sín týsdagsfund og mælir tí almenna í landinum til ikki at halda løn aftur hjá teimum, sum eru í verkfalli.

Tó eru tað arbeiðsgevarar, ið ikki stuðla hesum við ikki at rinda teimum løn, sum fara í verkfall.

- Vit fara sjálvandi at fremja bráðfengis uppgávur og skurðviðgerðir, sigur Runólfur Pálsson, sjúkrahússtjóri, við almennu kringvarpsrásina, RÚV.

Heitt verður á íslendskar menn um at vísa samhaldsfesti við kvinnunum við at taka sær av arbeiði, húsi og heimi.