Mærsk fer at siga 10.000 fólkum úr starvi

Mærsk fer at siga fleiri túsund fólkum upp í fyritøkuni. 

Tað merkir, at reiðaríið leggur niður 10.000 størv á heimsstigi, boðar fyritøkan frá í roknskaparfrágreiðingini fyri triðja ársfjórðing 2023, skrivar tíðindastovan Ritzau.

Orsøkin til hópuppsagnirnar eru broyttur marknaður við lægri umsetningi. 

- Okkara vinna er í eini tíð við minkandi eftirspurningi, lægri umsetningi, søguliga lágum farmaprísum og inflatiónstrýsti, sigur forstjórin í A. P. Møller, Vincent Clerc, í roknskaparfrágreiðingini.

Avgerðin ber í sær, at samlaða talið av starvsfólkum í Mærsk fer niður um 100.000 fólk.

Sambært Ritzau, so væntar Mærsk at spara 600 milliónir dollarar, sum svarar til 4,2 milliardir krónur, um árið, tá sæð verður burtur frá útreiðslunum í sambandi við uppsagnirnar.