Málningur hjá Picasso fór fyri eina milliard

Eitt av meistaraverkunum hjá kenda spanska listamálaranum Pablo Picasso er selt fyri 140 milliónir amerikanskar dollarar, svarandi til eina slaka milliard krónur, ella 970 milliónir krónur.

Tað er næsthægsti prísur, sum nakrantíð er latin fyri eitt verk av víðagitna listamálaranum.

Málningurin "Femme A La Montre", ið kann týðast til "Kvinna við uri," er málaður í 1932.

Málningurin ímyndar Marie-Thérèse Walter, sum var modell og frilla hjá Pablo Picasso.

Tað er ikki alment kent, hvør keypti málningin, sum Emily Fisher Landau, listasavnari, ið doyði í mars í ár, hevði átt síðani 1968, skrivar DR.