Ísrael ætlar at leypa á sjúkrahús í Gasa

Ísraelski herurin upplýsti í nátt, at hann er farin undir miðvíst álop á Hamas í einum parti av Shifa-sjúkrahúsinum í Gasageiranum. 

Tað skrivar Reuters.

Ísraelska verjan sigur, at álopið er grundað á upplýsingar frá fregnartænastuni. Herurin skal niðurberja Hamas og bjarga gíslum. 

Ísrael sigur, at Hamas-fólk krógva seg á sjúkrahúsinum, men hesum vísir Hamas aftur. 

- Ísrael er í kríggi við Hamas, ikki við sivilfólkið í Gasa, skrivar herurin.

Duga arabiskt

Í álopsdeildini eru medisinsk toymi og fólk, sum duga arabiskt, og hava fingið serliga upplæring, sigur herurin. Toymið skal, sambært Ísrael, bera so í bandi, at eingi sivilfólk, "sum Hamas brúkar at verja seg við", fáa skaða.

- Vit heita á allar Hamas-yvirgangsmenn, sum eru á sjúkrahúsinum, um at geva seg upp í hendurnar á Ísrael, eru boðini frá herinum.

Eitt talsfólk fyri heilsumyndugleikan í Gasa, sum Hamas hevur valdið á, hevur sagt við blaðið Al Jazeera, at tey hava fingið upplýsingar um, at ísraelskar deildir fara at leypa á Al-Shifa sjúkrahúsið í Gasa.

USA er ímóti

Hvítu húsini í Washington siga í fráboðan, at USA stuðlar ikki álopum á sjúkrahús úr luftini , og heldur ikki skotbardøgum á einum sjúkrahúsi.

Fráboðanin kom eftir, at ísraelski herurin í nátt boðaði frá miðvísa álopinum á Shifa-sjúkrahúsið.

Hvítu húsini siga, at sjúkrahús og sjúklingar skulu verjast.