Bretska avgerðin broytir ikki danska hugsjón

Hægstirættur skuldi meta, um Rwanda er trygt triðjaland, sum umsøkjarar um friðskjól kunnu sendast til, og niðurstøðan er, at tað er tað ikki, og tí er ætlanin hjá stjórnini ólóglig.

- Orsøkir eru til at halda, at fólk ið søkja um friðskjól eru í veruligum vanda fyri at fáa vánaliga viðferð í eini roynd at fáa tey aftur til heimlandið hjá sær, um tey verða send til Rwanda', stendur í dóminum í hægstarætti.

Hetta fær tó ikki donsku stjórnina at broyta ætlanir sínar um at stovna eitt móttøkumiðstøð í einum øðrum landi, sigur danski útlendinga- og integrationsráðharrim, Kaare Dybvad Bek, skrivar tíðindastovan Ritzau.

- Dómurin í Bretlandi broytir ikki tað, at tørvur er á nýggjum loysnum, ið skapa rættvísari skipan um friðskjól. Tað arbeiðir danska stjórnin framvegis við, eins og stjórnir í eini røð av øðrum ES-londum, sigur danski ráðharrin við Ritzau.