Frítekst tagging:
- Tíðindi, mentan og ítróttur
Føroyar køvdu albanska veitslurúsin
Føroyar køvdu albanska veitslurúsin
Føroyar endaðu EM-undankappingina ein og hon byrjaði; við einum stigi í Eysturevropa, og fingu ein góðan enda upp á eitt landsliðsár, sum helst skjótt verður gloymt
Jóan Símun Edmundsson roynir flogið á Air Albania-leikvøllinum
Mynd: Florion Goga/Reuters/Ritzau Scanpix
20.11.2023 - 19:37
Føroyar køvdu albanska veitslurúsin í Tirana, tá síðsti EM-undankappingardysturin í einum annars bleikum landsliðsári endaði við málleysum javnleiki frammanfyri glóðheitu viðhaldsfjøldini á Air Albania-leikvøllinum.
EM-kláru albanarnir høvdu kanska bestu kjansirnar, men føroyska avrikið var gott - allir spælararnir tóku tøk - spælið hekk væl saman í løtum og var eydnan við føroyingunum, kundi tað enda við føroyskari veitslu.
Føroyar byrjaðu væl
Føroyingarnir fingu eina góða byrjan upp á dystin frammanfyri veitslufúsu viðhaldsfólkunum á Air Albania-leikvøllinum, og spælararnir tóktust altráir eftir at vísa seg fram í ársins síðsta dysti.
Spælið hekk væl saman í løtum, og føroyingarnir hóttu mótstøðumálið viðhvørt - serliga eftir deyðbóltar.
Verri var, at bæði Mathias Lamhauge og Gunnar Vatnhamar fingu snuddir í nærdystum. Føroyski málverjin var somikið illa skaddur, at hann noyddist av vøllinum fyri Bárð á Reynatrøð. Myndirnar avdúkaðu, at B36-málverjin var tíðiliga ávirkaður av óhepnu støðuni.
Albanar høvdu hug at royna nýggja málverjan beinanvegin við skotum útifrá, men annars hevði heimaliðið ikki stórt at bjóða upp á í álopsspælinum.
Ikki fyrrenn beint fyri steðgin royndu teir seg av álvara. Fyrst fekk Myrto Uzuni alt ov nógv pláss og royndi seg við skoti frá 16 metrum, og beint eftir gjørdist Jasir Asani púra leysur í brotsteiginum, men í báðum førum stórbjargaði Bárður á Reynatrøð og bjargaði Føroyum eina málleysa hálvleiksstøðu.
Fánaðu so líðandi
Skaðatrupulleikarnir hildu fram eftir steðgin. Brandur Hendriksson Olsen fekk ein stoyt í knæið í fyrra hálvleiki, og eftir góðan tíma, mátti hann geva skarvin yvir.
Áðrenn tað hildu Føroyar fram við góða spælinum, og tá 55 minuttir vóru spældir, var Jóannes Bjartalíð sentimetrar frá leiðslumálinum, tá hann skeyt við høgra av brotsteigarmarkinum.
Albanski hátíðardámurin var køvdur munandi, og viðhaldsfólkini, sum tevjaðu blóð áðrenn dystin, fóru at rópa á sínar egnu.
Kontanti boðskapurin tóktist røkka niður á vøllin, har heimaliðið fekk tamarhald á í alsamt størri mun. Veruliga vandamikið gjørdist Albania kortini ongantíð, og so endaði undankappingin eins og hon byrjaði; við einum stigi í Eysturevropa.
Air Albania-leikvøllurin (EM-undankapping)
Albania - Føroyar, 0-0 (0-0)
Jóannes Bjartalíð var bert ein av føroyingunum, sum vísti seg frá síni bestu síðu í javnleikinum í Albania. MYND: Florion Goga/Reuters/Ritzau Scanpix
Gunnar Vatnhamar fekk ein snudd undir eyga aftir samanstoyt við Viljorm Davidsen, men leirvíkingurin vildi ikki geva skarvin yvir. MYND: Florion Goga/Reuters/Ritzau Scanpix
René Shaki Joensen byrjaði á sentrala miðvøllinum, og hansara orka og ágangandi stílur komu væl við hjá Føroyum. MYND: Florion Goga/Reuters/Ritzau Scanpix
Andrias Edmundsson fekk aftur álit frá venjaranum og ungi miðverjin mundi ikki seta ein fót skeivt í frálíkum avriki. MYND: Florion Goga/Reuters/Ritzau Scanpix
Er kopiera
Nýggjastu sendingar í ÚV
Nýggjastu sendingar í SV
