Magne Hoseth heldur helst fram í KÍ

Conference League-dysturin ímóti Lille í annaðkvøld verður neyvan hin síðsti hjá Magne Hoseth sum venjari hjá KÍ.

Norski miðilin, TV2, skrivaði í gjár, at felagið, Start, sum spælir í næstbestu norsku deildini, hevur tosað við KÍ-venjaran um høvuðsvenjarastarvið, men tíðindafundurin í Lille seinnapartin bendi á, at Magne Hoseth heldur fram í Klaksvík.

Tíðindamaðurin hjá Portal.fo, Agnar Prestá, spurdi Magne Hoseth, um hetta var kundi verða síðsti dystur hansara á KÍ-bonkinum.

 - Neyvan, svaraði KÍ-venjarin.

 - Eg havi verið fulltíðarfótbóltsspælari síðan eg var 17 ára gamal, og fór síðan beinleiðis til venjaragerningin og kenni hetta við søgunum og leysasøgunum. Eg veit ikki, hvar søgan kemur frá, men veit, at tey (TV2, red.) tosaðu við umboðsmann mín. Tað er tað. So hetta er ikki nakað, sum eg hugsi um. Eg hugsavni meg um KÍ og dystin í morgin, segði Magne Hoseth á tíðindafundinum.

Sambært TV2, hevur umboðsmaðurin hjá Magne Hoseth, Sverre Mauseth, onga viðmerking til søguna hjá norska miðlinum.