Vilja hava ríkisrættarmál móti Joe Biden

Meirilutin í amerikanska Umboðsmannatinginum tekur undir við einum ríkisrættarmáli móti forsetanum, Joe Biden.

Hvítu húsini í Washington siga, at kanningararbeiðið er politiskt grundað.

Atkvøðugreiðsla var um málið í Umboðsmannatinginum í gjár, har republikanararnir hava meirilutan. 

221 atkvøddu fyri og 212 ímóti.

Sonurin skuldsettur fyri mutur

Republikanararnir vilja hava eitt formligt ríkisrættarmál fyri at kanna skuldsetingar um mutur í sambandi við handilsvirksemi hjá Hunter Biden úti í heimi.

Republikanararnir skuldseta sonin hjá Joe Biden fyri at hava gjørt sær dælt av starvinum hjá pápanum sum varaforseti í stjórnini hjá Barack Obama fyri at útvega sær pening og støðu í Ukraina og Kina.

Fleiri hoyringar hava verið um málið, men republikanararnir hava ikki funnið prógv fyri, at sonur Biden hevur gjørt nakað galið.

Kortini halda republikanararnir, at nýggju kanningarnar fara at geva teimum víðari heimildir, og at meira ferð kemur á leitingina eftir prógvum.