Sleppa heim í dag

Fólk í Grindavík sleppa í dag til hús aftur, og tey kunnu sova heima hjá sær sjálvum, hava tey hug til tað.

Ulfar Ludviksson, politimeistari í Grindavík, sigur við íslendska kringvarpið, RUV, at hann tó ikki væntar, at nógv fara at halda jól í Grindavík, hóast tey nú hava møguleikan.

Tað var 10. november, at tey umleið 4000 fólkini í Grindavík vórðu flutt burtur í sambandi við harðar jarðskjálvtar og rivur í jørðini.

Eldgosið kom ikki fyrrenn mánadagin, men gjørdist ikki so ógvusligt, sum stúrt varð fyri. Tó hevur gosbræðingin spreitt seg yvir eitt øki uppá 3,7 kvadratkilometrar, uttan at hava rakt Grindavík.