Á trettanda tekur Sjálvstýri endaliga avgerð um útblaking

Leygardagin 6.januar hevur Sjálvstýri eykalandsfund í Lamba.

Fundurin skal millum annað staðfesta ella vraka avgerðina hjá landsnevndini um at blaka fýra menn úr flokkinum.

Hetta hendi fyri trimum vikum síðani.

Teir, sum eru koyrdir úr flokkinum, eru Sofus Hansen, Jan Asbjørnsson Joensen, Brandur Øssursson Simonsen og Bjørn á Heygum.
 
Orsøkin er, at teir fóru ímóti floksleiðsluni, tá Sofus Hansen vendi sær til Løgmálaráðið fyri at fáa innsavnaðu undirskriftirnar, sum vóru sendar ráðnum til góðkenningar í sambandi við uppstilling hjá flokkinum, og hann fekk tær.

Í móti vilja landsnevndarinnar 

Hetta var ikki sambært viljanum hjá landsnevndini, segði Sámal Petur í Grund, formaður í Sjálvstýri, tá. 

Landsnevndin hevur heimild til at strika limir.

Men eykalandsfundur skal góðkenna tað. Allir flokslimir kunnu fara á landsfund..

Útihýsingin fekk tó gildi alt fyri eitt.

Men verður hon ikki góðkend á eykalandsfundinum 6.januar, gerast teir fýra flokslimir aftur alt fyri eitt.