Hondbóltsfepurin við Løgmannabreyt er høgur

 - Fepurin er rættiliga høgur, omanfyri 40, haldi eg.

Tað sigur Høgni Joensen, stjóri á skúlanum við Løgmannabreyt, har tey eru óvanliga spent til EM í hondbólti, sum byrjar hósdagin.

Ikki færri enn sjey spælarar hava fingið sín barnalærdóm við Løgmannabreyt; Helgi Hildarson Hoydal, Pætur Mikkjalsson, Jónas Gunnarsson Djurhuus, Leivur Mortensen, Elias Ellefsen á Skipagøtu, Pauli Jacobsen og Rói Ellefsen á Skipagøtu.

Stjórin fortelur, at teir kanska ikki altíð vóru so lættir at fáa í tíma, men sum hann sigur: - Tað er ein farin tíð. Nú fegnast Høgni Joensen, eins og allir aðrir hoyvíkingar, um, at teir sjey skulu umboða Føroyar á størsta hondbóltspallinum.

 - Eg eri øgiliga stoltur og glaður teirra vegna. Eg haldi, at allir hesir her, og eisini aðrir, sum eru í periferiini á veg inn, eru næmingar, sum hav gingið og havt hondbólt her á skúlanum, sigur Høgni Joensen. - Men eg skal ikki eiga alla æruna av tí, skundar hann sær at leggja afturat.

Allir dystirnir hjá Føroyum verða vístir á stórskíggja í skúlanum við Løgmannabreyt.