Altingið viðger støðuna í Grindavík

Náttúruvanlukkan í Grindavík og handfaringin hjá íslendsku stjórnini eru fyrst á skránni fyri altingsfundin, sum byrjaði klokkan trý.

Katrín Jakobsdóttir, forsætisráðharri, skal greiða altinginum frá, hvussu støðan er nú. 

Síðani verður orðaskifti um frágreiðingina hjá forsætisráðharranum, har umboð fyri allar flokkar fáa orðið. Seinni verða ófráboðaðir fyrispurningar, skrivar íslendska kringvarpið. 

Fastur bústaður

Íslendska stjórnin hevur ætlanir um at veita grindavíkingum fastan bústað. 

Eisini verður arbeitt við eini loysn fyri tey, sum eiga hús ella íbúð í Grindavík, har íslendska ríkið keypir hús og íbúðir í býnum, loysir eigarar frá síni skuld til lánsveitarar, og at tey fáa íløguna afturgoldna. 

Uppskot um hetta verður væntandi klárt at leggja fyri altingið í næsta mánað, skrivar íslendska kringvarpið, RÚV.