21 ísraelskir hermenn doyðu, tá ein løðing brast fyrr enn ætlað

21 ísraelskir hermenn lótu lív í einum rakettálopi í gjár, boðaði ísraelski herurin frá í morgun. 

Hermenninir fyrireikaðu eina løðing, sum skuldi taka ein bygning niður í Gasa, tá ið ein rakett rakti nærindis.

Løðingin, sum hermenninir fyrireikaðu, sprongdist fyrr enn ætlað, og hermenninir lógu undir bygninginum, tá hann rapaði, skrivar tíðindastovan AP.

Hendingin er deyðiligasta álopið, sum ísraelski herurin hevur verið fyri, síðani kríggið millum Hamas og Ísrael brast á 7. oktober, siga talsfólk hjá ísraelska herinum. 

Størri trýst at fáa vápnahvíld

Deyðiliga hendingin kann hava við sær størri trýst á ísraelsku stjórnina, um at fáa í lag vápnahvíld, skrivar AP.

Sambært nýggjastu tíðindunum frá ísraelska herinum, hava ísraelskar herdeildir kringsett býin Khan Younis har suðuri í Gaza, sum verður hildin at vera ein høvuðsborg hjá Hamas. 

Sambært miðlinum "Times of Israel", eru nógv Hamas-fólk dripin í álopum á Khan Younis.

Eisini nógv sivilfólk hava latið lív. Seinasta samdøgrið hava 195 palestinar latið lív, hevur heilsumálaráðið í Gasa boðað frá, skrivar danska kringvarpið. DR leggur aftrat, at søguliga sæð hava upplýsingar av hesum slagi frá hesi keldu verið eftirfarandi og sambærlig við tøl frá neyðhjálparfelagsskapum.